我真係可以順產呀

5月1日

20：45有少許出血，食埋個晚餐先

21：30第二次出血，換衫，老公公陪同之下去法國醫院

22：00辦理入院登記手續，我同老公公分別都有勁多FORM要填，比姑娘檢查果時，被讚個子宮軟，夠靚喎^^仲話聽日醫生檢查之後應該都唔比你走，生得架啦添！唔知真定假呢？因為唔少CASE都係出血然後住院一日，第二日返屋企，直到穿水或者有陣痛先至再入院GE。老公公交完按金之後，佢就返屋企lu

22：25而我就開始聽天晴的心跳，有郁動就按制的檢查，要做成個鐘架，聽起上來都有d悶，不過聽住天晴的心跳聲，同埋比佢撐下撐下，d時間又過得幾快喎

23：30完晒成個檢查之後，我都入房323B訓lu
其實成晚都訓得唔太好，訓下醒下咁

5月2日
06：15起身lu，因為

06：30姑娘話要同我放大便呀，過程不便多說^^仲量左2次血壓，1次體溫添

07：30yeah~見到老公公啦！結左婚3年半以黎都未分開訓過架，今次為左囡囡就要破例幾晚lu

10：00等左好耐，終於等到郭醫生同我檢查lu，佢亦都係話我個子宮靚呀~應該今日可以生架啦！仲話我個子宮已經已經開左2隻手指位啦！但我未feel 痛，所以安排我去打催生劑喎~嘩！突然覺得，天晴要出世，等左差唔多10個月，終於都可以同天晴見面啦！原來上帝早已安排的日子係2011年5月2日。

11：00被安排到去303-3房，好似前一晚咁聽bb心跳

11：20開始打催生劑，因為姑娘話大概係下午or黃昏時間生，所以老公公返左屋企眠一眠，食個lunch先至再返來陪我

13：00開始有規律咁感覺到成個肚硬住同埋有d痛，仲問姑娘lee隻係咪就係傳說中的陣痛呀？姑娘話：係呀~你依家先至感覺得到咋！但係個子宮未有1度喎！噢~心情有點沈重，原來2隻手指都唔等於1度！！！

13：30嘩！開始頂唔順啦！越來越厲害啦~同埋懷疑穿左水，就叫姑娘檢查，原來係未穿ge~跟住就send sms叫老公公快d到黎陪我

13：40"pop"一聲，今次d羊水真係穿左啦！叫姑娘幫我檢查，今次係堅架啦！話我個子宮開左2度啦！but我真係好痛，姑娘就話比個氣我聞喎

13：45第一次聞氣，個人係"溫溫鄧鄧"，好似無意識咁，的確係有幫助減少痛楚，但感覺不良好，唔鍾意lee種感覺

14：00短短15分鐘已經痛左幾次，吸左幾次，sms比老公公都好幾次，突然聽到一把至愛的聲音，老公公你到啦！我同老公公講，好痛呀~頂唔順啦~嘩！突然又痛，用力捉住老公公隻手狂吸，下肢不斷抽搐！！！"救命呀！不如同醫生講開刀啦~"老公公初初都話”你加油！你得架！”但當見到我真係好痛好頂唔順，同埋我真係捉得佢好痛之下，佢都同意幫我問下姑娘有無得轉做開刀啦！姑娘即刻就入黎檢查話已經開到6度啦！lee個時候去開刀好唔抵架，我已經叫左郭醫生啦！依家推你入產房啦！

仲聽到出面d姑娘話：下！11點幾先至催生咋喎~咁快生得啦！本來覺得子宮開得2度就已經咁辛苦，隔離床果個係開左2-3度有位就入產房咋，d姑娘仲話佢應該要夜晚至生到。咁我不如唔好捱、唔好忍，快快開刀算啦！點不知突然話開左6度、仲超快手快腳咁推我入產房！原來我真係有機會順產架！不過真係好痛囉！仲要過去產房果時無得聞氣呀~嘩！又叫又典床典蓆咁！好耐命囉~經過好幾次叫苦連天之後，終於有返氣聞，不過都係醫生快d黎快d生好d。

聞返氣都要繼續典、繼續叫，由個肚開始直到腳板底都係痛囉~幾分鐘之後見到醫生啦！正式開始生啦！首先要枱高雙腳，痛果時雙手用力拉前面2個手挽，頭要向前傾，用力痾阿b出黎。又叫又用力又痛之下做左好幾次，姑娘叫我唔出聲，我就唔出聲，不過唔係次次記得^^叫得最慘果次係用緊力果時被醫生剪開呀~嘩！果下叫聲我就失左聲啦！超勁呀^^好彩，多得醫生、老公公、姑娘不斷咁鼓勵我，讚我之下，我估大概經歷左4次出力啦！點不知，第5次可能係上帝比力量我，我超級用力咁做好每個動作，我感覺到有野o係我身上出來呀~原來血淋淋的天晴從醫生的手中抱出黎啦！

14：52生左啦！生左啦！我終於生左啦！天晴出世啦！嘩！此時的我已經無氣又無晒力啦！塊面已經一點血色都無啦！不過好感動呀~上帝幫助左我只係經歷2個鐘頭的痛楚就讓我可以生到天晴啦！

感謝主！感謝老公公！感謝郭醫生！感謝姑娘！阿們！